2 Tawarikh 25

Iatonna duangpulollima taunna tu Amazia, dadimi datu nama’parenta duangpulo ngkasera taunna dio Yerusalem. Iatu indo’na disanga Yoadan, dio mai Yerusalem.

Napogau’mi tu apa malolo dio pentiroNa PUANG, apa tae’ nalantuk penaanna.

Iatonna manda’mo tu kadatuan lan limanna, napateimi tu mintu’ to mase’ponna, tu mangka umpatei datu, ambe’na.

Apa iatu anakna tau iato mai tae’ napatei, susitu disura’ lan Sukaran aluk, iamotu lan sura’na Musa, tu Nanii PUANG mepasan Nakua: Tae’ nala mate tu mai ambe’ natumang anakna, sia tae’ nala mate tu mai anak natumang ambe’na sangadinna pantan la mate natumang kasalanna kalena.

Mangkato narampunmi Amazia tu mintu’ to Yehuda, napasituntunanni unturu’ rapunna, tu naparenta mintu’ kamandangna to sangsa’bu sia mintu’ kamandangna to saratu’ dio mai mintu’ lili’na Yehuda sia Benyamin; nabilangmi tu tau iato mai randuk dio mai duangpulo taunna ba’tu la’bii; naappa’mi tu surodadu talluratu’ sa’bu, tu malinta’ parari umpopa’buno doke sia balulang.

Napa’pesaroi duka saratu’ talenta salaka dio mai Israel tu saratu’ sa’bu surodadu malinta’.

Apa sae misa’ taunNa Puang Matua lako kalena, anna ma’kada nakua: O datu, da namale sola puangku tu surodadu Israel belanna tae’ Narondongi PUANG tu to Israel, iamotu mintu’ to Efraim.

Apa male bangmokomi, pogau’mi tu iannato, pabatta’i tu kalemi parari: manassa Puang Matua la umbambangangkomi dio tingayona uali, belanna kuasa tu Puang Matua patunduan sia kuasa duka pabambangan.

Ma’kadami tu Amazia lako taunNa Puang Matua nakua: Umbamo la nakua tu saratu’ talenta tu mangka kuben surodadu Israel? Apa mebali tu taunNa Puang Matua nakua: Iatu diona PUANG tu la Nabenkomi losong na iate.

Nasarakkimi Amazia tu surodadu, tu sae dio mai Efraim lako kalena, anna sule lako tondokna. Attu iato re’dekmi ara’na tu tau iato mai lako Yehuda anna sule lako inanna nakabu’ kasengkeanna.

Umpabatta’mi kalena tu Amazia, nasolammi tu surodadunna lako Lombok-Ma’sin, napatei tu to Seir sangpulo sa’bu.

Ondongpi narampa tuo to Yehuda tu surodadunna sangpulo sa’bu, anna baai tu tau iato mai langngan botto buntu batu, anna pembuanganni dao mai botto buntu batu iato, naurungan tisepak-sepak nasang tu tau iato mai.

Apa iatu mintu’ surodadu, tu nasua Amazia sule, naurunganni tae’ namale sola parari, ke’de’ dio mai Samaria ullaoi ba’tu pira-pira kota Yehuda sae lako Bet-Horon, anna patei tu tau tallungsa’bu sia unnala pangrampa buda.

Iatonna sulemo tu Amazia untalo to Edom, napabendanmi tu rapang-rapang dipodeatanna to Seir, tu nabaa, napodeata, anna tukku menomba dio tingayona sia memala’ lako.

Iamoto re’dekmi ara’na tu PUANG lako Amazia, Nasuai tu misa’ nabi lako kalena, tu ma’kada lako nakua: Ma’apai midaka’i tu rapang-rapang dipodeatanna bangsa iato, tu inang tae’ nakullei urrampanan taunna lan mai kuasammi?

Apa marassan bangsia sipa’kada, nakuami datu lako: Naangka’rokomika tau pa’bisaranna datu? Kappakomi, apa gai’mi la napatei tau? Kappami tu nabi sia ma’kada nakua: Kuissanmo, kumua Nalampak dukamo Puang Matua la ussanggangikomi, belanna penggauran susimmi te sia tae’ miperangii tu pa’pakilalangku.

Mangkato sipa’kada-kadami Amazia, datu Yehuda, tu to naala parea, anna sua tau umparampoi lako Yoas, anakna Yoahas, anakna Yehu, datu Israel, kumua: Maikomi anta sipempangan sirari.

Apa mesua tu Yoas, datu Israel, lako Amazia, datu Yehuda, nakua: Iatu a’da’ dao Libanon ussua pesua lako kayu arasi’ tu dao Libanon, kumua: Benni anakku muane tu anakmi baine napobainei. Apa lendu’ tu olo’-olo’ dao Libanon, anna silullu’i tu a’da’ iato.

Misanga: manassa kutalomo tu to Edom; iamoto anna matampo penaammi sia undaka’komi kamala’biran. Torrokomi totemo lan banuammi. Ma’apari ammi daka’ri tu kamandasan, miurunganni sanggang sola to Yehuda?

Apa tae’ naperangii Amazia, belanna inang Nalampakmo Puang Matua la ussorongi lako tau iato mai, belanna nadaka’mo tu rapang-rapang dipodeatanna Edom.

Ke’de’mi tu Yoas, datu Israel, anna sipempangan sirari la ia la Amazia, datu Yehuda, dio Bet-Semes, lan lili’na Yehuda.

Iatu to Yehuda natalomo to Israel, anna pada mallai sule lako to’ tendana.

Iatu Yoas, datu Israel, untingkan Amazia, anakna Yoas, datu Yehuda, dio Bet-Semes, anna baai lako Yerusalem. Natuanni tu benteng tembo’ Yerusalem, randuk dio mai babangan Efraim sae lako Babangan-Tetuk, a’pa’ratu’ siku.

Naala nasangmi tu bulaan sia salaka sia mintu’ pareanan tu lan banuanNa Puang Matua, nakampai Obed-Edom, sia ia duka tu mintu’ ianan lan tongkonan layukna datu, sia ba’tu pira-pira tau mangindo’i, namane sule lako Samaria.

Iatu Amazia, anakna Yoas, datu Yehuda, tuopa sangpulo lima taunna, tonna matemo tu Yoas, anakna Yoahas, datu Israel.

Iatu tang dipokadannapa tu mintu’ tuna’na Amazia, tu dolona sia undinna, manassa inang tisura’mo lan sura’ ossoranna mintu’ datu Yehuda.

Randuk dio mai attu nanii Amazia memboko’ dio mai PUANG, sipakulu-kulumi tu tau dio Yerusalem la umpatei. Mallaimi lako Lakhis. Apa mesua tu tau iato mai unula’i lako Lakhis, anna patei dio.

Napalanganmi tau darang anna dipeliang dipasola nene’ to dolona lan kotana Daud.